Bende beroof en ontvoer dominee op plaas

Ds. Albert Venter (56) van Marble Hall in Limpopo is Vrydag deur plaasaanvallers in die kattebak van sy motor geboender en ontvoer. (Foto: Willem Pelser)

17/01/2009 21:49 – (SA)

Willem Pelser

Marble Hall

’n Grootskeepse soektog is Vrydag op tou gesit na ’n bende plaasaanvallers wat ’n predikant van Marble Hall ontvoer en beroof het.

’n Polisiehelikopter en helikopters van plaaslike boere is onder meer ingespan om in die ruigtes by Marble Hall te soek na die bende wat ds. Albert Venter (56) Vrydagoggend oorval het.

Met druktyd is ’n man wat op en af naby Venter se plaas gery het deur die polisie ondervra. Hy is egter nog nie aangekla nie en word steeds ondervra, het ’n senior bron in die polisie gister gesê.

Venter was gister steeds getraumatiseer. Hy vertel hy was op pad na die kerkkantoor by die NG kerk op die dorp toe hy by sy plaashek deur vyf aanvallers voorgekeer is. Vier was met pistole en rewolwers gewapen.

Hulle het Venter hardhandig op die grondpad naby die plaashek neergegooi en op sy rug gestaan terwyl hy deurgesoek is vir geld.

Hulle het sy beursie, bankkaarte, selfoon en horlosie gevat.

Toe Venter by die rowers pleit dat hulle tog net nie sy trouring ook moet vat nie, het een van die rowers ’n rewolwer oorgehaal en teen Venter se kop gedruk. Hy het gegil Venter moet stilbly en dat hy nie sal huiwer om hom te skiet nie.

Die aanvallers het Venter in die kattebak van sy Volkswagen Polo Classic ingeboender en lank met hom rondgery op ’n veldpaadjie die bosse in.

“Dit was absoluut angswekkend terwyl ek in die kattebak was; ek was oortuig hulle gaan my doodmaak,” sê hy.

Maar ná ’n ruk se rondryery in die veld het hulle by sy plaashuis stilgehou.

“Toe ek besef die bende is nou by my huis, het ek hardop gebid dat my vrou, Susan, tog net gespaar moet bly. Dit was ’n verskriklike gevoel om te weet ek is magteloos om my vrou te help. Dit was die donkerste oomblikke van my lewe,” vertel Venter.

Een van die rowers het intussen uitgeklim en kalm na die plaashuis se voordeur gestap. Toe mev. Venter by die voordeur kom nadat sy voetstappe gehoor het, het die rower ’n pistool op haar gerig terwyl hy “good morning” gesê het.

Mev. Venter het geskrik en “histeries na die studeerkamer gehardloop”. Sy het die polisie met haar selfoon gebel.

Toe die rowers sien die voordeur is gesluit, het hulle weggejaag, met Venter steeds in die kattebak. Sy hande was vasgebind.

’n Ent van die plaashuis af het die rowers onverklaarbaar stilgehou en die veld ingevlug.

Venter kon hom ná ’n ruk loswoel en het in die kattebak die agterste sitplekke oopgebeur en só uitgekom.

Die polisie was binne vyf minute op die toneel en het versterkings van so ver as Polokwane ontbied. Venter is baie beïndruk deur die polisie van Marble Hall se reaksie. “Hier was binne minute seker 50 of 60 polisiemanne op die plaas,” sê hy.

’n Bron in die polisie het gister gesê die aanvallers is vermoedelik dieselfde bende wat die gebied al ’n jaar lank teister.

Oorsprong:Rapport
http://www.news24.com/Rapport/Suid-Afrika/0,,752-2460_2454871,00.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: